बाढी प्रभावित क्षेत्रबाट फेला परेको धनमाल तथा महत्वपूर्ण कागजात प्रहरीलाई बुझाउन आग्रह

काठमाडौं । नेपाल प्रहरीले बाढी तथा डुबानबाट प्रभावित क्षेत्रबाट फेला परेका धनमाल, महत्वपूर्ण कागजात तथा अन्य सामग्री सम्बन्धित धनीसम्म सुरक्षित रूपमा पुर्‍याउन सहयोग गर्न सर्वसाधारणलाई आग्रह गरेको छ।

नेपाल प्रहरी प्रधान कार्यालय, कार्य विभाग, कार्य शाखा, काठमाडौंले “अत्यन्त जरुरी सार्वजनिक सूचना” जारी गर्दै बाढी प्रभावित क्षेत्रबाट फेला परेका धनमाल तथा महत्वपूर्ण कागजात सम्बन्धमा सर्वसाधारणलाई सचेत गराएको हो।
प्रहरीका अनुसार बाढी तथा डुबानका कारण घर, पसल तथा अन्य संरचनाबाट धनमाल र महत्वपूर्ण कागजात बगाएर अन्यत्र पुगेको हुन सक्ने भएकाले त्यस्ता सामग्री कसैलाई फेला परेमा आफैंसँग राख्नुको सट्टा नजिकैको प्रहरी कार्यालयमा बुझाउनुपर्नेछ।

प्रहरीले विशेषगरी फेला परेको सुन, चाँदी, नगद, बैंक कार्ड, नागरिकता, राहदानी, सवारी चालक अनुमतिपत्र लगायतका महत्वपूर्ण कागजात तत्काल नजिकको प्रहरी कार्यालयमा बुझाउन आग्रह गरेको छ। यस्ता सामग्री सम्बन्धित व्यक्तिका लागि अत्यन्त महत्वपूर्ण हुने भएकाले फेला पार्ने व्यक्तिले इमान्दारीपूर्वक प्रहरीलाई बुझाएर सामाजिक दायित्व निर्वाह गर्नुपर्ने प्रहरीले जनाएको छ।

सूचना पाए तत्काल प्रहरीलाई खबर गर्न आग्रह

बाढी प्रभावित क्षेत्रमा कसैले धनमाल वा महत्वपूर्ण सामग्री फेला पारेको, कसैले त्यस्ता सामग्री लुकाएको वा प्रयोग गरिरहेको जानकारी भएमा तत्काल प्रहरीलाई सूचना दिनसमेत नेपाल प्रहरीले आग्रह गरेको छ। प्रहरीले सार्वजनिक गरेको सूचनामा “कसैले फेला पारेको, लुकाएको वा प्रयोग गरेको थाहा भएमा तुरुन्त प्रहरीलाई सूचना दिनुहोस्” भनिएको छ। साथै सूचना दिने व्यक्तिको नाम गोप्य राखिने स्पष्ट पारिएको छ। बाढी, पहिरो तथा डुबानजस्ता प्राकृतिक विपद्का बेला नागरिकको घर तथा व्यवसायमा क्षति पुग्नुका साथै धनमाल हराउने तथा महत्वपूर्ण कागजात नष्ट हुने अवस्था सिर्जना हुने गर्छ। यस्तो अवस्थामा पीडितको समस्याको फाइदा उठाउँदै अरूको सम्पत्ति कब्जा गर्ने, लुकाउने, प्रयोग गर्ने वा हिनामिना गर्ने कार्य कानुनविपरीत हुने प्रहरीले जनाएको छ।

बाढीपीडितको सम्पत्तिमा बदमासी गरे कडा कारबाही

नेपाल प्रहरीले बाढीपीडितको अवस्थाको फाइदा उठाएर अरूको धनमाल कब्जा गर्ने वा लुकाउने कार्यलाई गम्भीर रूपमा लिएको छ। सार्वजनिक सूचनामा बाढीपीडितको फाइदा उठाई अरूको धनमाल कब्जा, लुकाउने, प्रयोग वा हिनामिना गर्ने कार्य मुलुकी अपराध संहिता, २०७४ बमोजिम दण्डनीय हुने उल्लेख गरिएको छ। प्रहरीले विपद्को समयमा पीडितको सम्पत्तिमा गैरकानुनी रूपमा हात हाल्ने, भेटिएको सामान आफूसँग राख्ने वा वास्तविक धनीलाई फिर्ता नगर्ने गतिविधिमाथि कानुनअनुसार कडा कारबाही हुने चेतावनी दिएको छ। विपद्को समयमा हराएको धनमाल तथा कागजात फेला पार्ने नागरिकले प्रहरीलाई बुझाएमा त्यसको वास्तविक धनी पहिचान गरी सम्बन्धित व्यक्तिलाई फिर्ता गर्न सहज हुने प्रहरीको भनाइ छ।

मानवता र सामाजिक जिम्मेवारी निर्वाह गर्न अपिल

प्रहरीले विपद्को समयमा एक–अर्कालाई सहयोग गर्नु सबै नागरिकको सामाजिक तथा मानवीय दायित्व भएको जनाएको छ। बाढीपीडितको दुःख र कठिन परिस्थितिको फाइदा उठाउनुको सट्टा उनीहरूको हराएको सम्पत्ति सुरक्षित राखेर प्रहरीमार्फत सम्बन्धित व्यक्तिसम्म पुर्‍याउन सहयोग गर्न प्रहरीको अपिल छ। प्रहरीको सूचनामा “मानवीय बनौं, सहयोग गरौं” भन्ने सन्देशसमेत दिइएको छ। त्यस्तै विपद्को समयमा अवसर होइन, साथ र सहयोग दिनुपर्नेमा जोड दिँदै “विपद्को समयमा अवसर होइन, साथ र सहयोग दिऔं” भन्ने सन्देश सार्वजनिक गरिएको छ।

नेपाल प्रहरीले बाढी तथा अन्य विपद्का कारण विस्थापित तथा प्रभावित नागरिकको सुरक्षा, उद्धार र सम्पत्ति संरक्षणलाई प्राथमिकतामा राख्दै आएको जनाएको छ। साथै विपद्को समयमा शंकास्पद गतिविधि, चोरी, लुटपाट वा हराएको धनमालसम्बन्धी जानकारी प्राप्त भएमा तत्काल नजिकको प्रहरी कार्यालयमा सम्पर्क गर्न सर्वसाधारणलाई आग्रह गरिएको छ।