मोहम्मद जयन्तीका दिन मधेस प्रदेशमा मुस्लिम धर्मावलम्बीलाई सार्वजनिक बिदा
जनकपुरधाम – मधेस प्रदेश सरकारले भोलि भदौ १० गते बुधबार परेको मोहम्मद जयन्ती (मोहम्मद दिवस) का अवसरमा प्रदेशमा बिदा दिने निर्णय गरेको छ। प्रदेश सरकारको गृह, सञ्चार तथा कानुन मन्त्रालयले सूचना जारी गर्दै उक्त दिन मुस्लिम धर्मावलम्बीका लागि बिदा हुने जनाएको हो।
मन्त्रालयले जारी गरेको सूचनामा नेपाल राजपत्रमा मिति २०८२/११/१५ गते प्रकाशित सूचना अनुसार मोहम्मद जयन्तीका दिन नेपाली मुस्लिम धर्मावलम्बीहरूका लागि बिदा दिने व्यवस्था रहेको उल्लेख गरिएको छ। सोही व्यवस्थाअनुसार २०८३ साल भदौ १० गते बुधबार मोहम्मद जयन्ती परेको हुँदा मधेस प्रदेशमा उक्त दिन मुस्लिम धर्मावलम्बीका लागि बिदा दिने निर्णय गरिएको मन्त्रालयले जनाएको छ।
मन्त्रालयका अनुसार बिदासम्बन्धी निर्णयलाई सम्बन्धित सबैको जानकारीका लागि सार्वजनिक गरिएको हो। मन्त्रालयले जारी गरेको सूचनामा प्रदेशभित्र मोहम्मद जयन्तीका अवसरमा मुस्लिम समुदायका धर्मावलम्बीहरूले आफ्नो धार्मिक तथा सांस्कृतिक परम्पराअनुसार पर्व मनाउन सहज होस् भन्ने उद्देश्यले बिदाको व्यवस्था गरिएको जनाइएको छ।
मोहम्मद जयन्ती इस्लाम धर्मावलम्बीहरूले पैगम्बर हजरत मोहम्मदको जन्मदिनका रूपमा धार्मिक श्रद्धा र आस्थाका साथ मनाउने महत्वपूर्ण अवसर हो। यस अवसरमा मुस्लिम समुदायले विभिन्न धार्मिक कार्यक्रम, प्रार्थना तथा शुभकामना आदानप्रदानलगायतका गतिविधि गर्ने गर्छन्।
मधेस प्रदेशमा मुस्लिम समुदायको उल्लेख्य जनसंख्या रहेको छ। प्रदेश सरकारले धार्मिक तथा सांस्कृतिक पर्वका अवसरमा समुदाय विशेषलाई लक्षित गरी बिदा दिने व्यवस्था गर्दै आएको छ। गृह, सञ्चार तथा कानुन मन्त्रालयका प्रवक्ता राजेशंकर प्रसाद पालले हस्ताक्षर गरेको सूचनामा मिति २०८३/०५/०९ गते उक्त जानकारी सार्वजनिक गरिएको उल्लेख छ।
