मुख्यमन्त्री यादवले भौतिक पूर्वाधारमन्त्री समीरलाई दिए कार्यवाहक मुख्यमन्त्रीको जिम्मेवारी
जनकपुरधाम । मधेश प्रदेशका मुख्यमन्त्री कृष्ण प्रसाद यादवले धार्मिक प्रयोजनका लागि नेपाल बाहिर जानुपर्ने भएपछि भौतिक पूर्वाधार विकासमन्त्री मोहम्मद समीरलाई कार्यवाहक मुख्यमन्त्रीको जिम्मेवारी तोकेका छन्। मुख्यमन्त्री तथा मन्त्रिपरिषद्को कार्यालय, मधेश प्रदेशले २०८३ भदौ ५ गते जारी गरेको पत्रमार्फत मन्त्री समीरलाई कार्यवाहक मुख्यमन्त्री तोकिएको जानकारी गराएको हो। पत्र मुख्यमन्त्री कृष्ण प्रसाद यादवको हस्ताक्षरसहित जारी भएको छ।
पत्रमा मुख्यमन्त्री यादवले आफू धार्मिक प्रयोजनका लागि नेपाल बाहिर जानुपर्ने भएकाले २०८३ भदौ ६ गतेदेखि आफू नेपाल फर्किएर नआउन्जेलसम्मका लागि भौतिक पूर्वाधार विकासमन्त्री समीरलाई कार्यवाहक मुख्यमन्त्री तोकेको उल्लेख रहेको छ। मधेश प्रदेश सरकार (कार्यसम्पादन) नियमावली, २०८० को नियम १४ को उपनियम (३) बमोजिम समीरलाई कार्यवाहक मुख्यमन्त्रीको जिम्मेवारी तोकिएको पत्रमा स्पष्ट पारिएको छ।
मुख्यमन्त्रीको अनुपस्थितिमा प्रदेश सरकारको नियमित प्रशासनिक तथा कार्यकारी कामकारबाहीलाई निरन्तरता दिन समीरले कार्यवाहक मुख्यमन्त्रीका रूपमा जिम्मेवारी सम्हाल्नेछन्। पत्रमा कार्यवाहक जिम्मेवारीको अवधि मुख्यमन्त्री यादव नेपाल नफर्किएसम्म रहने उल्लेख गरिएको छ। मुख्यमन्त्री तथा मन्त्रिपरिषद्को कार्यालयले उक्त पत्रको बोधार्थ मधेश प्रदेशका प्रदेश प्रमुखलाई समेत पठाएको छ। पत्रको प्रतिलिपि माननीय प्रदेश प्रमुखज्यूको कार्यालय, मधेश प्रदेश, जनकपुरधामलाई बोधार्थ दिइएको देखिन्छ।
मुख्यमन्त्री यादवको विदेश भ्रमण धार्मिक प्रयोजनका लागि हुने पत्रमा उल्लेख भए पनि भ्रमणको गन्तव्य, अवधि तथा धार्मिक कार्यक्रमबारे भने पत्रमा थप विवरण खुलाइएको छैन। मन्त्री समीरलाई कार्यवाहक मुख्यमन्त्रीको जिम्मेवारी दिइएसँगै मुख्यमन्त्री यादवको अनुपस्थितिमा मधेश प्रदेश सरकारको नेतृत्व समीरले गर्ने भएका छन्। उनी हाल मधेश प्रदेश सरकारका भौतिक पूर्वाधार विकासमन्त्रीका रूपमा जिम्मेवारीमा छन्। मुख्यमन्त्री कार्यालयबाट जारी पत्रको विषय ‘कार्यवाहक तोकिएको’ रहेको छ। पत्रको चलानी नम्बर ३९ रहेको छ भने मिति २०८३/०५/०५ उल्लेख गरिएको छ।
