भौतिक पूर्वाधार विकास मन्त्रालयको जिम्मेवारीमा मन्त्री महमम्द समिर
जेष्ठ – १२
जनकपुरधाम – मधेस प्रदेश सरकारका बिना विभागीय मन्त्री मा. महमम्द समिरलाई भौतिक पूर्वाधार विकास मन्त्रालयको जिम्मेवारी प्रदान गरिएको छ। प्रदेश सरकारको मन्त्रिपरिषद् कार्यविभाजनअनुसार उहाँले आजदेखि मन्त्रालयको नेतृत्व सम्हाल्नु भएको हो।
प्रदेश सरकारमा सक्रिय रूपमा काम गर्दै आउनुभएका समिरलाई महत्वपूर्ण मन्त्रालयको जिम्मेवारी दिइएपछि मधेस प्रदेशको विकास निर्माण क्षेत्रमा नयाँ अपेक्षा बढेको छ। विशेषगरी सडक, पुल, भवन, सिँचाइ, शहरी विकास तथा अन्य पूर्वाधार निर्माणका योजनालाई प्रभावकारी रूपमा अघि बढाउने विश्वास गरिएको छ।
जिम्मेवारी सम्हाल्दै मन्त्री समिरले मधेस प्रदेशको समग्र विकासका लागि भौतिक पूर्वाधार क्षेत्रलाई प्राथमिकतामा राखेर काम गर्ने प्रतिबद्धता व्यक्त गर्नु भएको छ। उहाँले विगतदेखि अधुरा रहेका विकास आयोजनाहरूलाई शीघ्र सम्पन्न गराउने, गुणस्तरीय निर्माण कार्य सुनिश्चित गर्ने तथा जनताको प्रत्यक्ष सरोकार रहेका योजनालाई तीव्र गतिमा अगाडि बढाउने बताउनु भयो।
मन्त्री समिरले विकास निर्माणमा पारदर्शिता, प्रभावकारिता र जनउत्तरदायित्व कायम गर्दै प्रदेश सरकारको विकास अभियानलाई सफल बनाउने लक्ष्य लिएको उल्लेख गर्नु भयो। उहाँले ग्रामीण भेगका सडक सञ्जाल विस्तार, पुल निर्माण, सरकारी संरचना निर्माण तथा आधारभूत पूर्वाधार विकासलाई विशेष प्राथमिकतामा राखिने जानकारी दिनु भएको छ।
भौतिक पूर्वाधार विकास मन्त्रालय प्रदेशको विकाससँग प्रत्यक्ष जोडिएको महत्वपूर्ण मन्त्रालयका रूपमा हेरिने भएकाले मन्त्री समिरको जिम्मेवारीलाई राजनीतिक तथा प्रशासनिक रूपमा समेत चासोका साथ हेरिएको छ। उहाँलाई नयाँ जिम्मेवारी प्राप्त भएपछि विभिन्न राजनीतिक दलका नेता, कार्यकर्ता, शुभेच्छुक तथा सर्वसाधारणले बधाई तथा शुभकामना व्यक्त गरेका छन्। मन्त्री समिरको नेतृत्वमा मधेस प्रदेशको विकास निर्माण कार्यले थप गति लिने अपेक्षा गरिएको छ।
