मकवानपुर । मकवानपुरको हेटौँडा उपमहानगरपालिका–१५ स्थित रातोमाटेमा प्रहरीले करिब १५ किलो चाँदीसहित चार जना भारतीय नागरिकलाई पक्राउ गरेको छ। विशेष सूचनाका आधारमा खटिएको प्रहरी टोलीले वीरगञ्जबाट काठमाडौँतर्फ जाँदै गरेको भ्यान जाँच गर्ने क्रममा उक्त चाँदी बरामद गरेको हो।
प्रहरीका अनुसार आइतबार दिउँसो प्रहरी चौकी रातोमाटेबाट प्रहरी नायब निरीक्षक प्रमोदप्रसाद साहको कमान्डमा खटिएको टोलीले ना.३ च ७०७९ नम्बरको सानो भ्यानलाई रोकेर जाँच गरेको थियो। सोही क्रममा भ्यानमा सवार चार जना भारतीय नागरिकको साथबाट अन्दाजी १५ किलो चाँदी फेला परेपछि उनीहरूलाई नियन्त्रणमा लिइएको प्रहरीले जनाएको छ।
वीरगञ्जबाट काठमाडौँतर्फ जाँदै गरेको सवारीसाधनमा चाँदी फेला परेपछि प्रहरीले बरामद वस्तुको स्रोत, ओसारपसारको उद्देश्य तथा त्यसमा संलग्न व्यक्तिहरूबारे अनुसन्धान अघि बढाएको छ।
प्रहरीले घटनासम्बन्धी थप अनुसन्धान भइरहेको जनाएको छ। बरामद चाँदीको आधिकारिक पहिचान, मूल्य तथा पक्राउ परेका व्यक्तिहरूले त्यससम्बन्धी आवश्यक कागजात पेस गरे–नगरेको विषयमा भने थप विवरण सार्वजनिक हुन बाँकी छ।
