जनताको घर–घरमा पुगे भौतिक पूर्वाधार विकास मन्त्री महम्मद समीर, नागरिकका समस्या सुनेर समाधानको प्रतिबद्धता

बारा /- मधेश प्रदेश सरकारका भौतिक पूर्वाधार विकास मन्त्री माननीय महम्मद समीरले आफ्नो निर्वाचन क्षेत्रअन्तर्गत पर्ने कलैया उपमहानगरपालिका वडा नं. ७ र २० तथा फेटा गाउँपालिका वडा नं. ६ मा घरदैलो कार्यक्रम सञ्चालन गर्दै नागरिकसँग प्रत्यक्ष संवाद गरेका छन्।

जनताको नेता, जनताकै घर–घरमा” भन्ने अभियानअन्तर्गत मन्त्री समीरले स्थानीय नागरिकको घरदैलोमै पुगेर उनीहरूले भोगिरहेका समस्या, गुनासा, सुझाव तथा विकासका आवश्यकताबारे प्रत्यक्ष रूपमा जानकारी लिएका हुन्। उनले नागरिकसँग खुला छलफल गर्दै तत्काल र दीर्घकालीन समाधानका उपायबारे समेत विस्तृत संवाद गरेका थिए।
कार्यक्रमका क्रममा मन्त्री समीरले जनप्रतिनिधिको प्रमुख दायित्व जनताको भावना बुझ्नु र उनीहरूको आवश्यकतालाई सम्बोधन गर्नु भएको उल्लेख गर्दै निर्वाचनका बेला जनतासमक्ष गरेका प्रतिबद्धतालाई व्यवहारमा उतार्न आफू निरन्तर सक्रिय रहेको बताए। उनले विकासको आधार जनताको सहभागिता र सुझाव भएकाले हरेक योजनाको केन्द्रमा नागरिकलाई राखेर काम गरिने स्पष्ट पारे।

घरदैलोका क्रममा स्थानीयवासीले सडक, नाला, पुल निर्माण, खानेपानी, स्वास्थ्य सेवा, शिक्षा, कृषि, सिँचाइ, रोजगारी, युवाको सीप विकास, सरसफाइ तथा सामाजिक सुरक्षा लगायतका विषयमा आफ्ना समस्या र माग प्रस्तुत गरेका थिए। स्थानीयले वर्षौंदेखि अधुरा रहेका विकास आयोजनाहरूलाई शीघ्र सम्पन्न गर्न, कृषि उत्पादन बढाउन आवश्यक पूर्वाधार निर्माण गर्न, गुणस्तरीय स्वास्थ्य सेवा विस्तार गर्न तथा युवाका लागि रोजगारी सिर्जना गर्ने कार्यक्रम सञ्चालन गर्न आग्रह गरेका थिए।

मन्त्री समीरले स्थानीयले उठाएका प्रत्येक विषयलाई गम्भीरतापूर्वक लिएको उल्लेख गर्दै सम्भव भएका काम तत्काल अगाडि बढाइने र दीर्घकालीन योजना आवश्यक पर्ने विषयहरूलाई सम्बन्धित निकायसँग समन्वय गरी कार्यान्वयन गरिने प्रतिबद्धता व्यक्त गरे। उनले विकास कुनै एक व्यक्तिको प्रयासले मात्र सम्भव नहुने भन्दै जनप्रतिनिधि, कर्मचारी र नागरिकबीचको सहकार्यबाट मात्रै समृद्ध समाज निर्माण गर्न सकिने धारणा राखे।

छलफलका क्रममा नागरिकले विकास निर्माणका काममा पारदर्शिता, गुणस्तर र समयमै सम्पन्न हुने वातावरण सुनिश्चित गर्न पनि आग्रह गरेका थिए। मन्त्री समीरले विकास आयोजनामा अनियमितता हुन नदिने, जनताको प्रत्यक्ष निगरानीलाई प्रोत्साहन गर्ने तथा आवश्यकताका आधारमा प्राथमिकता निर्धारण गरी योजनाहरू अघि बढाइने बताए।
घरदैलो अभियानका क्रममा मन्त्री समीरले विभिन्न टोल तथा बस्तीमा पुगेर ज्येष्ठ नागरिक, किसान, युवा, व्यवसायी तथा स्थानीय अगुवासँग छुट्टाछुट्टै भेटघाट गरेका थिए। नागरिकहरूले आफ्नो घरमै मन्त्री आएर समस्या सुनेकोमा खुसी व्यक्त गर्दै यस्ता कार्यक्रमलाई निरन्तरता दिनुपर्ने धारणा राखेका थिए।

मन्त्री समीरले निर्वाचन क्षेत्र नं. ३ (ख) को समग्र विकासलाई प्राथमिकतामा राख्दै पूर्वाधार निर्माणसँगै शिक्षा, स्वास्थ्य, कृषि, खानेपानी, रोजगारी तथा सामाजिक विकासका क्षेत्रमा योजनाबद्ध रूपमा काम भइरहेको बताए। उनले विकासका योजना बनाउँदा जनताको वास्तविक आवश्यकता, स्थानीय प्राथमिकता र दीर्घकालीन प्रभावलाई आधार बनाइने उल्लेख गरे।

मन्त्री समीरले जनताको विश्वास नै आफ्नो सबैभन्दा ठूलो शक्ति भएको उल्लेख गर्दै “जनताको चाहना नै हाम्रो प्राथमिकता” भन्ने मूल भावनाका साथ आगामी दिनमा पनि नियमित रूपमा जनताबीच पुगेर समस्या सुन्ने, सुझाव संकलन गर्ने र विकास निर्माणका कामलाई प्रभावकारी रूपमा अघि बढाउने प्रतिबद्धता व्यक्त गरेका छन्।
स्थानीयवासीले पनि जनप्रतिनिधि प्रत्यक्ष रूपमा गाउँ–बस्तीमा आएर संवाद गर्नु सकारात्मक अभ्यास भएको बताउँदै यस्ता कार्यक्रमले सरकार र नागरिकबीचको दूरी घटाउने तथा विकासका कामलाई थप प्रभावकारी बनाउने विश्वास व्यक्त गरेका छन्।