रौतहट – अख्तियार दुरुपयोग अनुसन्धान आयोग को टोलीले जिल्ला रौतहटको रौतहट जिल्ला अदालत मा कार्यरत खरिदार लव कुमार सिंहलाई रु. ५० हजार घुससहित मँगलबार रंगेहात नियन्त्रणमा लिएको छ।
आयोगको हेटौंडा कार्यालयबाट खटिएको विशेष टोलीले अदालतको फैसलाबमोजिम दर्ता–खारेजी (दा.खा.) पुर्जी गरी जग्गा फुकुवा गराइदिने नाममा सेवाग्राहीसँग घुस मागिरहेको सूचना तथा उजुरीका आधारमा छापा मारेको थियो। सो क्रममा सिंहले सेवाग्राहीबाट लिइसकेको रु. ५० हजार नगद रकमसहित उनलाई पक्राउ गरिएको हो।
आयोगका प्रवक्ता सुरेश न्यौपाने का अनुसार, आरोपित सिंहलाई गौर नगरपालिका–१ स्थित अदालत परिसरबाट नियन्त्रणमा लिइएको हो। पक्राउ गर्दा घुस रकमसँगै प्रयोग गरिएको मोबाइल फोनसमेत बरामद गरिएको छ।
प्रारम्भिक अनुसन्धानमा अदालतको निर्णय कार्यान्वयन प्रक्रियासँग सम्बन्धित सेवा प्रदान गर्ने क्रममा अनियमित लाभ लिएको आशंका गरिएको छ। घटनापछि उनलाई नियन्त्रणमा राखी थप अनुसन्धान प्रक्रिया अघि बढाइएको आयोगले जनाएको छ।
अख्तियारले सार्वजनिक सेवामा हुने भ्रष्टाचारविरुद्ध शून्य सहनशीलताको नीति अनुरूप यस्ता गतिविधिमाथि कडाइको साथ कारबाही जारी रहने स्पष्ट पारेको छ।
